Constitution Day: ملک بھر میں یوم دستور کا اہتمام، دستور کی روح کو برقرار رکھنا ضروری

Reading Time: 3 minutes

انڈیا میں ہر سال 26 نومبر کو ملک گیر سطح پر یوم دستور (Constitutional Day) منایا جاتا ہے۔ جس میں دستور کی اہمیت، خصوصیت اور اس میں بیان کیے گئے بنیادی حقوق و بنیادی فرائض کا ذکر کیا جاتا ہے۔ آج کے دن دستوری اقدار کی اہمیت کو بھی بیان کیا جاتا ہے۔ تاکہ دستور کی روح کو برقرار رکھا جائے۔

یوم دستور کے موقع پر وزیر اعظم نریندر مودی (Narendra Modi) نے جمعہ کو ہندوستان کے پہلے صدر جمہوریہ راجندر پرساد (Rajendra Prasad) اور آئین کے مسودے کی کمیٹی کے سربراہ ڈاکٹر بی آر امبیڈکر (Dr BR Ambedkar) کو یاد کیا، جس میں حکومت اور عوام دونوں کے حقوق اور فرائض کو بیان کرنے والی دستاویز کی اہمیت پر زور دیا گیا ہے۔

مودی نے ٹوئٹ کیا کہ ’’یوم آئین پر ہمارے شہریوں کو نیک خواہشات پیش ہیں! آج کے خاص دن کے موقع پر 4 نومبر 1948 کو دستور ساز اسمبلی میں ڈاکٹر امبیڈکر کی تقریر کا ایک حصہ شیئر کررہا ہوں؛ جس میں انہوں نے مسودہ آئین کو منظور کرنے کی تحریک پیش کی تھی، جسے مسودہ کمیٹی نے طے کیا تھا‘‘۔

انہوں نے ہندی میں بھی ٹویٹ کیا کہ ’’کوئی بھی آئین چاہے کتنا ہی خوبصورت، منظم اور مضبوط کیوں نہ ہو اگر اسے ملک کے سچے، نڈر اور بے لوث خادموں نے نہیں چلایا تو آئین سے کچھ نہیں ہو سکتا۔ ڈاکٹر راجندر پرساد کا یہ جذبہ آج بھی ایک رہنما کی طرح کارکرد ہے‘‘۔

یوم آئین ہر سال 26 نومبر کو منایا جاتا ہے، کیونکہ اسی دان سنہ 1949 میں دستور ساز اسمبلی کے ذریعہ ہندوستانی آئین کو اپنایا گیا تھا۔ اس کے بعد 26 جنوری 1950 کو دستور کا نفاذ عمل میں آیا تھا۔ واضح رہے کہ پہلی بار یوم آئین سنہ 2015 میں منایا گیا تھا، تاکہ ہندوستان کے پہلے وزیر قانون ڈاکٹر بی آر امبیڈکر کو خراج عقیدت پیش کیا جائے۔

وزیر اعظم کے دفتر (PMO) کے مطابق یوم دستور کی تقریبات کے ایک حصے کے طور پر صدر رام ناتھ کووند (Ram Nath Kovind) پارلیمنٹ میں ایک پروگرام کی صدارت کررہے ہیں اور پی ایم مودی نے اس تقریب میں شرکت کی۔ وزیراعظم شام 5.30 بجے سپریم کورٹ کے زیر اہتمام دو روزہ یوم آئین کی تقریبات کا افتتاح بھی کریں گے اور معزز وکلا سے خطاب بھی کریں گے۔

مرکزی وزیر پرہلاد جوشی نے منگل کو اعلان کیا کہ اس پروگرام میں نائب صدر وینکیا نائیڈو، لوک سبھا اسپیکر اوم برلا اور دیگر کئی معززین بھی شرکت کریں گے۔ پارلیمانی امور کے وزیر نے کہا کہ اس تقریب کا اہتمام لوک سبھا سکریٹریٹ اور اسپیکر کر رہے ہیں۔